Marcos Hall of Justice

MARCOS HALL OF JUSTICE

RETRATO N.18

[Koleksion Dagiti Nagkauna a Ladawan iti Siudad ti Laoag]

MASARAKAN ti CARCEL PUBLICA iti amianan ti Laoag City Hall

ken abagatan a laud ti Kapitolio iti Probinsia ti Ilocos Norte-- a pagopisinaan [nakaibalayan] ti Regional, City ken Municipal Trial Courts iti agdama.

Maysa laeng a kadsaaran [bilang ti katuon] ngem dakkel ken nalawa a nasukog ti kuadrado iti tengnga ti pasdek. Idi nagbayag, nanayonan iti maysa pay a katuon ti pasdek nga am-ammo ita ti nagan a Marcos Hall of Justice.

Maawagan iti Royal Audiencia ti korte suprema idi panawen ti kastila. Ipanguluan/Idauluan ti maysa a presidente nga isu ti Gobernador-Heneral ti Royal Audiencia. Maawagan dagiti miembro ti Korte Suprema iti Oidores a pakaibilangan ti dua a fiscal-- maysa ti agpaay a mangasikaso ti kaso-kriminal idinto ti maikadua tamingenna dagiti kaso-pangsibil.

Idi tawen 1893, naestablisar ti territorial audiencia iti Cebu ken maysa iti Vigan. Ipanguluan met laeng ti Presidente ken dagiti miembrona a maawagan iti Associate Justices ti Territorial Audiencia. Ofisial nga adda iti poder [hurisdiksion] dagitoy nga Associate

Justices mainaig iti panagaramid kadagiti desision ti mayapela a kaso-kriminal.

Ti Marcos Hall of Justice iti lugar a nangdependaran ti agtutubo a Ferdinand Marcos ti bagina iti pannakausig ti nakairamananna a kaso ti Nalundasan murder. Bayat ti kaaddana iti pagbaludan, ditoy a nagadal [nagrebiu] ti preparasionna para iti bar examinations a nakagun-odanna

ti kangatoan a puesto ti grado. Ket kas maysa nga abogado ken nangiyabogado iti bagbagina, winaswas ti Korte Suprema ti kaso a nakairamananna gapu't kinakurang ti ebidensia kontra kenkuana.

.

.

.

.

.

MARCOS HALL OF JUSTICE

Retrato N.18

[Koleksion Dagiti Nagkauna a Ladawan iti Siudad ti Laoag]

Rudy Ram. Rumbaoa

wwwkoleksiondagitinagkaunaaladawan.blogspot.com

[nabulod dagiti ladawan a nausar]

 

ILOCOS NORTE NATIONAL HIGH SCHOOL [INNNHS]

ILOCOS NORTE NATIONAL HIGH SCHOOL [INNNHS]

RETRATO N.17

[Koleksion Dagiti Nagkauna a Ladawan iti Siudad ti Laoag]

SIDADAYAW ti Ilocos Norte National High School

[dati nga Ilocos Norte High School] a nagsurat iti bukodna 

a pakasaritaan kadagiti naglabas a tawen--

nga in-inut a nagbalin a pakasaritaan ken pakabigbigan

ti nagbalin a historia daytoy.

Namuangayan daytoy a pakasaritaan a pakairamanan 

ti organisasion ken pannakabangon iti first year class

idi 19o6 a ditoy ti nakaibalayan ti elementary grades

iti Acosta Building.

Nabangon ti second year class idi 19o9 a sinaruno 

ti third class idi 191o. Kamaudiananna, nakompleto

ti sibubukel a kurso idi 1916--eksakto sangapulo a tawen

kalpasan a naestablisar ti klase iti umuna a tawen.

Nakompleto a nabangon idi 19o9 ken naawagan ti umuna

a permanente a pasdek iti Ilocos Norte Provincial High School,

dua a tawen kalpasan a nagiyalokar ti Honorable Board

iti nesesita ken maikanatad a pundo ti pannakagastos iti 

pannakabangon ti pasdek. Daytoy nga istraktura ket ti agdama

nga Related-Subjects-Building ti Ilocos Norte College of Arts and Trades [INCAT] ita. 

Tapno masupusopan ti panagkurang dagiti pasdek ken panagadu

dagiti estudiante nga agbasa, nabangon ti baro a pasdek

idi 1929 iti kaarruba a disso nga isu ita ti nagtakderan

ti Ilocos Norte National High School. Ngem daksanggasat

ta nauram ken nakaro a nadadael ti nasao a pasdek idi Hunio 1941

isut' gapuna nga iti sumaruno a serrek ti klase,

iti grandstands wenno dakkel ken nalawa nga entablado

ti provincial grounds ken sumagmamano a naupaan

a balbalay ti nagklasian/nagbasaan dagiti estudiante.

Bayat dagiti tawen ti gubat iti okupasion ti Hapon,

adda dua a nagsina a pasdek-- naawagan dagitoy

iti Boys' High School ken Girls' High School.

Naperdi ti pasdek idi 1946 isut' gapuna a nateramaan

ken napabaro iti tulong ti Estados Unidos iti babaen

ti Rehabilitation Act of 1946.

.

.

.

.

.

ILOCOS NORTE NATIONAL HIGH SCHOOL [INNHS]

Retrato N.17

Rudy Ram. Rumbaoa

wwwkoleksiondagitinagkaunaaladawan.blogspot.com

*Nabulod dagiti ladawan a nausar ken ni Luther Parker/

Philippine National Library