PALACIO DEL GOBERNADOR Retrato, N.16 [Koleksion Dagiti Nagkauna a Ladawan iti Siudad ti Laoag]

PALACIO DEL GOBERNADOR

Retrato, N.16

[Koleksion Dagiti Nagkauna a Ladawan iti Siudad ti  Laoag]

TI Palacio Del Gobernador ti pagnaedan ken pagopisinaan dagiti gobernador sibil iti Ilocos Norte.

Makita ti dakkel a grandioso a pasdek [pondasion] iti akin-amianan a sikigan ti plaza. Dua ti pagserkan iti pasdek, maysa iti laud ken maikadua iti daya a paset ti nakaipatakderan ti kiosko wenno bassit a pagtagilakuan s sumango iti amianan.

Daytoy a pasdek ti nagserbi nga opisina ti Gobernador Sibil, sekretario, pagopisinaan dagiti lokal  a sanga ti gobierno karaman ti Oficina de Haciendas, lugar a pagidulinan iti kinabaknang ken rekursos [treasury] ken guardia sibil.

Idi tawen 1918, nasuktan ken nabaliwan iti neoklasiko a disenio ti pasdek.

Iti agdama, napapintas, naipalawa ken nanayonan iti likud. Napatakderan pay iti pannaka-"dome" iti likud ti pasdek. Karaman ti pasdek iti 'Project 3' iti Probinsia ti Ilocos Norte.

Ti nasao a pasdek ket isu ti agdama nga Ilocos Norte Provincial Capitol iti Siudad ti Laoag.

.

.

.

.

.

PALACIO DEL GOBERNADOR

Retrato, N.16

[Koleksion Dagiti Nagkauna a Ladawan iti Siudad ti Laoag]

Rudy Ram. Rumbaoa

wwwkoleksiondagitinagkaunaaldawan.blogspot.com

#palaciodelgobernador #ilocosnorteprovincialcapitol #ilocosnorte #siudadtilaoag #gobernadorsibil #oficinadehaciendas #guardiasibil #pagidulinan #kinabaknang #rekursos #project3 #neoklasioko #ericsonjosue #koleksion #nagkauna #ladawan #retrato16 #rudyramrumbaoa

[Nabulod ti ladawan a nausar ken ni Rev. Ericson M. Josue]

ILOCOS NORTE HEROES MEMORIAL [INHM] HALL wenno ti nalatak nga awagna a "HEROES HALL"

ILOCOS NORTE HEROES MEMORIAL [INHM] HALL

wenno ti nalatak nga awagna a "HEROES HALL"

Retrato, N.28

[Koleksion Dagiti Nagkauna a Ladawan iti Siudad ti Laoag]

MAYSA kadagiti naimballigian unay a napasamak iti probinsia idi nasapa a tawen ti 1970’s ket ti pannakabangon ti Ilocos Norte Heroes Memorial [INHM] Hall, wenno ti nalatlatak nga awagna a “HEROES HALL” iti sentro ti Siudad ti Laoag. Masarakan daytoy a pasdek iti asideg ti Laoag City Plaza [wenno Aurora Park ita], Marcos Hall of Justice, Laoag Central School, torre ti pagkampanaan ni San Guillermo, dagiti simbaan ti Katoliko Romano ken Aglipayano, City Hall ti Laoag ken Kapitolio ti Probinsia iti Ilocos Norte. Dati pay a naawagan ti nasao a pasdek iti “Ablan Heroes Memorial Hall.” Immabot iti tallopulo ket tallo tawen ti konstuksion sakbay a nalpas ti nasao a pasdek.

Naisangsangayan ti kontribusion ti pasdek iti pakasaritaan ti probinsia ti lugar a nagtakderan ti Heroes Hall iti agdama. Dakkel nga espasio ti nasao a lugar a nagserbi a pakaangayan dagiti sosial, kultural ken politika a parambak kas iti civic-military parades, pasala, demonstrasion ti paay-ayam, trade fairs, political rallies, evening dances, coronation rites ken pagpabuyaan iti karnibal.

Nabangon ti Gabaldon a disenio ken klasena a pasdek iti Laoag Central School idi tawen 1929, nagtalinaed ti nasao a lugar a silulukat kadagiti amin a maangay a parambak agingga a narugian ti pannakabangon ti pasdek kalpasan ti Maikadua a Gubat iti Sangalubongan.

Narugian ti konstruksion ti Ablan Heroes’ Memorial Hall iti panawen ti panagtugaw ni Diputado Dr. Damaso T. Samonte iti Umuna a Distrito ti Ilocos Norte, 1946-1949. Ngem daksanggasat ta napasardeng ti proyekto gapu iti panagkurang ti pundo a nausar. Nupay kasta gapu iti singasing wenno mosion ni Gobernador Elizabeth Marcos-Keon, agdama a gobernador idi, inaprobaran ti provincial board iti Ilocos Norte ti 1971 resolution no. 48 a P10,000.00 manipud iti Roads and Bridges Fund ti probinsia tapno maileppas ti Ablan Heroes Memorial Hall. Nagtultuloy ti panagdur-as ti konstruksion agingga iti tawen 1974. Iti napintas a panangidaulo ni Gob. Marcos-Keon ti probinsia, nabaliwan ti Ablan Heroes’ Memorial Hall iti Ilocos Norte Memorial Hall [INMH] a naidedikar ken naisagut kadagiti amin a bannuar ti Ilocos Norte.

Naawagan pay ti pasdek a maysa kadagiti kapintasan nga architectural marvel ken simbolo iti progreso ti probinsia.

Ti Heroes Hall ket 4-storey building. No addaka iti ngato [rooftop] a paset ti pasdek, nalawag a matannawagan ken makita iti baba ti Karayan Padsan ken intero a pakabuklan ti Gilbert Bridge [Marcos Bridge itan].

Dramatiko ti karakter a buya ti INMH ta nausar ti columns ken arc-window a disenio a maitulad kadagiti pasdek iti Amerika.

Iti agdama, inukoparan ken paglakuan ti SM Hypermarket a kukua ti SM Prime Holdings nga idauluan ni Henry Sy, Sr., pondador ti SM Supermalls.

.

.

.

.

.

ILOCOS NORTE HEROES MEMORIAL [INHM] HALL wenno ti nalatak nga awagna a "HEROES HALL"

RETRATO N.28

[Koleksion Dagiti Nagkauna a Ladawan iti Siudad ti Laoag]

Rudy Ram. Rumbaoa

wwwkoleksiondagitinagkaunaaladawan.blogspot.com

#ilocosnorteheroesmemorialhall #heroeshall #ablanheroesmemorialhall #laoagcity #ilocosnorte #pakasaritaan #smhypermarket #gabaldonadisenio #damasotsamonte #elizabethmarcoskeon #koleksion #nagkauna #ladawan #rudyramrumbaoa

*Nabulod dagiti ladawan a nausar iti PGIN CMO

MAYSAKA Laengen a Lagip

MAYSAKA laengen a lagip

Sika a Monumento ti Monopolio iti Tabako

Sika ti gameng ti kalman

ngem kas man awan serbim

iti agdama a henerasion

ta dida ammo ti pudno a pakasaritaam...

*Karaman iti ladawan ti nalatak a lumlumned a torre ti pagkampanaan

ni San Guillermo, Siudad ti Laoag]

.

.

.

.

.

MAYSAKA Laengen a Lagip

Retrato, N.42

[Koleksion Dagiti Nagkauna a Ladawan iti Siudad ti Laoag]

Rudy Ram. Rumbaoa

wwwkoleksiondagitinagkaunaaladawan.blogspot.com

#lagip #monumento #monopolio #tabako #gameng #kalman #henerasion #pudno #pakasaritaan #siudadtilaoag #koleksion #ladawan #nagkauna

#retrato #rudyramrumbaoa

[Nabulod ti ladawan a nausar]