TI LUMLUMNED A TORRE TI PAGKAMPANAAN

TI LUMLUMNED A TORRE TI PAGKAMPANAAN

Retrato, N.43

[Koleksion Dagiti Nagkauna a Ladawan iti Siudad ti Laoag]

AH, uray sika, kailiwka met a makita manen. Kaano aya daydi naudi nga iyuumayko nagtakder iti sakaanam ken tinangadko ti sibubukel a pakabuklam? Sangapulo ket pito gayamen a tawen ti napalabas, piman.

Ala wen, addanto latta manen gundaway nga agkitata.

.

.

.

.

.

TI LUMLUMNED A TORRE TI PAGKAMPANAAN

[Ti Simbaan ni San Guillermo]

Retrato, N.43

[Koleksion Dagiti Nagkauna a Ladawan iti Siudad ti Laoag

Rudy Ram. Rumbaoa

wwwkoleksiondagitinagkaunaaladawan.blogspot.com

#lumlumned #torre #pagkampanaan #simbaan #sanguillermo #siudadtilaoag #iliw #makita #pakasaritaan #koleksion #nagkauna #ladawan #rudyramrumbaoa

[Nabulod ti ladawan a nausar]

ILOCOS NORTE HEROES MEMORIAL [INHM] HALL wenno ti nalatak nga awagna a "HEROES HALL"

ILOCOS NORTE HEROES MEMORIAL [INHM] HALL

wenno ti nalatak nga awagna a "HEROES HALL"

Retrato, N.28

[Koleksion Dagiti Nagkauna a Ladawan iti Siudad ti Laoag]

MAYSA kadagiti naimballigian unay a napasamak iti probinsia idi nasapa a tawen ti 1970’s ket ti pannakabangon ti Ilocos Norte Heroes Memorial [INHM] Hall, wenno ti nalatlatak nga awagna a “HEROES HALL” iti sentro ti Siudad ti Laoag. Masarakan daytoy a pasdek iti asideg ti Laoag City Plaza [wenno Aurora Park ita], Marcos Hall of Justice, Laoag Central School, torre ti pagkampanaan ni San Guillermo, dagiti simbaan ti Katoliko Romano ken Aglipayano, City Hall ti Laoag ken Kapitolio ti Probinsia iti Ilocos Norte. Dati pay a naawagan ti nasao a pasdek iti “Ablan Heroes Memorial Hall.” Immabot iti tallopulo ket tallo tawen ti konstuksion sakbay a nalpas ti nasao a pasdek.

Naisangsangayan ti kontribusion ti pasdek iti pakasaritaan ti probinsia ti lugar a nagtakderan ti Heroes Hall iti agdama. Dakkel nga espasio ti nasao a lugar a nagserbi a pakaangayan dagiti sosial, kultural ken politika a parambak kas iti civic-military parades, pasala, demonstrasion ti paay-ayam, trade fairs, political rallies, evening dances, coronation rites ken pagpabuyaan iti karnibal.

Nabangon ti Gabaldon a disenio ken klasena a pasdek iti Laoag Central School idi tawen 1929, nagtalinaed ti nasao a lugar a silulukat kadagiti amin a maangay a parambak agingga a narugian ti pannakabangon ti pasdek kalpasan ti Maikadua a Gubat iti Sangalubongan.

Narugian ti konstruksion ti Ablan Heroes’ Memorial Hall iti panawen ti panagtugaw ni Diputado Dr. Damaso T. Samonte iti Umuna a Distrito ti Ilocos Norte, 1946-1949. Ngem daksanggasat ta napasardeng ti proyekto gapu iti panagkurang ti pundo a nausar. Nupay kasta gapu iti singasing wenno mosion ni Gobernador Elizabeth Marcos-Keon, agdama a gobernador idi, inaprobaran ti provincial board iti Ilocos Norte ti 1971 resolution no. 48 a P10,000.00 manipud iti Roads and Bridges Fund ti probinsia tapno maileppas ti Ablan Heroes Memorial Hall. Nagtultuloy ti panagdur-as ti konstruksion agingga iti tawen 1974. Iti napintas a panangidaulo ni Gob. Marcos-Keon ti probinsia, nabaliwan ti Ablan Heroes’ Memorial Hall iti Ilocos Norte Memorial Hall [INMH] a naidedikar ken naisagut kadagiti amin a bannuar ti Ilocos Norte.

Naawagan pay ti pasdek a maysa kadagiti kapintasan nga architectural marvel ken simbolo iti progreso ti probinsia.

Ti Heroes Hall ket 4-storey building. No addaka iti ngato [rooftop] a paset ti pasdek, nalawag a matannawagan ken makita iti baba ti Karayan Padsan ken intero a pakabuklan ti Gilbert Bridge [Marcos Bridge itan].

Dramatiko ti karakter a buya ti INMH ta nausar ti columns ken arc-window a disenio a maitulad kadagiti pasdek iti Amerika.

Iti agdama, inukoparan ken paglakuan ti SM Hypermarket a kukua ti SM Prime Holdings nga idauluan ni Henry Sy, Sr., pondador ti SM Supermalls.

.

.

.

.

.

ILOCOS NORTE HEROES MEMORIAL [INHM] HALL wenno ti nalatak nga awagna a "HEROES HALL"

RETRATO N.28

[Koleksion Dagiti Nagkauna a Ladawan iti Siudad ti Laoag]

Rudy Ram. Rumbaoa

wwwkoleksiondagitinagkaunaaladawan.blogspot.com

#ilocosnorteheroesmemorialhall #heroeshall #ablanheroesmemorialhall #laoagcity #ilocosnorte #pakasaritaan #smhypermarket #gabaldonadisenio #damasotsamonte #elizabethmarcoskeon #koleksion #nagkauna #ladawan #rudyramrumbaoa

*Nabulod dagiti ladawan a nausar iti PGIN CMO

TI TUROD ITI ERMITA KEN LUGAR A NAKAIMULAAN TI KAYO A KROS, KEN NAKAARMIDAN TI UMUNA A MISA ITI ILOKOS

TI TUROD ITI ERMITA KEN LUGAR A NAKAIMULAAN TI KAYO A KROS, KEN NAKAARMIDAN TI UMUNA A MISA ITI ILOKOS

Retrato N.24

[Koleksion Dagiti Nagkauna a Ladawan iti Siudad ti Laoag]

MAKITA ken masarakan ti Ermita Hill iti abagatan a daya a paset ti Siudad ti Laoag.

Sakbay a sinakup dagiti kastila ti siudad, paggigiananen dagiti nagkauna nga umili iti Laoag ti turod no sadino a nagbangonda kadagiti agdedekket a pagtaengan iti lawlawna. Pinili dagiti natibo daytoy a lokasion a pakabangonan ti komunidad saan laeng a gapu ti kaasideg ti lugar iti karayan no di pay ket importante para kadakuada a paggapuan ti taraon ken danum nga inumenda.

Idi sakbay nga agngudo ti 16th century, pinadur-as dagiti misionario ti kondision ti panagbiag dagitoy a natibo, nayakarda iti baro a pagyananda iti sentro ti Laoag nga isu ti Partke ni Aurora ita.

Nabangon ti kongkreto a kros nga agarup 28-metro ti katayagna iti tuktok ti turod idi 1972 a kas simbolo ti pannakalagip ti Maikapat a Sentenario ti Kristianisasion iti Ilocos. Ti nakaay-ayat, naangay ti umuna a misa iti Siudad ti Laoag iti Ermita Hill.

Kalpasanna, nagbalin nga umuna a missionaries' quarters ken umuna a kapiliada ngem daksanggasat ta napuoran ti daan a pasdek idi Hunio 14, 1988 a nakarippuoganna. Naipatakder dagiti lima a letra L-A-O-A-G iti tuktok ti turod nga agserbi a kas “marker” ti siudad.

Saan laeng a kinatalged [kinatalna] ti madiskobre no di pay ket adda gundaway a makita ti pakabuklan ti siudad-- ti Padsan River ken karruba nga ili a kas ti San Nicolas, Sarrat ken Vintar. Iti daya a paset, makita dagiti bantay ti Apayao a maawagan iti Cordillera Mountain Ranges.

.

.

.

.

.

TI TUROD ITI ERMITA KEN LUGAR A NAKAIMULAAN TI KAYO A KROS, KEN NAKAARMIDAN TI UMUNA A MISA ITI ILOKOS

Retrato N.24

[Koleksion Dagiti Nagkauna a Ladawan iti Siudad ti Laoag]

Rudy Ram. Rumbaoa

wwwkoleksiondagitinagkaunaaldawan.blogspot.com

#turod #ermita #lugar #nakaimulaan #kayo #kros #nakaaramidan #umuna #misa #koleksion #nagkauna #ladawan #siudadtilaoag #ilocosnorte #pakasaritaan #pakalaglagipan #rudyramrumbaoa

[Nabulod dagiti ladawan a nausar]