TORRE A PAGBANTAYAN ITI GABU KEN LA PAZ [Pagbantayan Idi Panawen ti Kastila] Retrato, N.21

TORRE A PAGBANTAYAN ITI GABU KEN LA PAZ

[Pagbantayan Idi Panawen ti Kastila]

Retrato, N.21

[Koleksion Dagiti Nagkauna a Ladawan iti Siudad ti Laoag]

TI Ilocos Norte ti maudi a probinsia iti Rehion ti Ilocos a pagdaliasatan nga agturong iti amianan a laud a paset ti pagilian. Iti datos a naidukomento, addaan ti probinsia iti innem a torre a pagbantayan ken nabigbig dagitoy a kas nailian a tawid ken kinabaknang.

Nangted dagitoy a torre kadagiti nakadiskobre iti dua a kapanunotan ken panagamiris: Umuna, maipada daytoy kadagiti sabsabali pay nga immun-una a nadiskobre a nabangon a torre --- a nabangon iti lugar nga adayo ti baybay; ken Maikadua, importante ti torre gapu ti kaasidegna iti puyupoyan ken nagserbi a pagbantayan ken mangwanawan/mangkita ti aktibidad iti bunganga ti Karayan Padsan a kangrunaan a nawaya a pagdaliasatan iti naglabas a panawen. Saan a mailibak a daytoy a torre a pagbantayan ket adda bukodna a guardia a mangkita ti kangrunaan a pagserkan.

Maibilang daytoy a paset ti baybay iti amianan q daladal dagiti pirata nga agraut ti galeon [ti barko a paglayag a pangkomersial] idi un-unana a panawen ti panagnegosio isu  a mapapati a nabangon dagiti torre iti siudad.

Ti ebidensia a kaadda ti "torre a pagbantayan" ti mangiladawan iti kinaimportansia a maproteharan ken masalakniban ti ili [saan pay a siudad idi] in kaso nga adda mapasamak a panagraut iti Laoag.

Sabali laeng ti estoria dagiti nagkauna a nagnaed iti siudad a kunada: Adda bukodna a barangay ti naporma a sand dunes ti La Paz a naawagan iti "torre."

Kinaagpaysuananna, adda pay sabali a torre a nabangon iti kasumbangir a bunganga ti Karayan Padsan. Patien pay dagiti nakadiskobre kadagitoy a dua ti nabangon a torre iti kangrunaan a pagserkan ti Laoag idi a kas met ti nabangon a kaadda ti pantalan iti Currimao, Ilocos Norte ken Romblon iti Probinsia ti Romblon idi panawen ti panagsakup ti kastila iti pagilian. Daksanggasat ta dagiti nabatbati pay a paset ti instraktura ket pinisangen ti daga.

Idi agdama, makita pay laeng ti sumagmamano a radrilio a naiwara iti daga a mapapati a nagtakderan ti nasao a torre--- a mangpankenke ken ebidensia a nabangon ti maysa a "torre a pagbantayan" idi un-unana a panawen iti ili ti Laoag a napagbalin a siudad ita.

.

.

.

.

.

TORRE A PAGBANTAYAN ITI GABU KEN LA PAZ

[Pagbantayan Idi Panawen ti Kastila]

Retrato, N.21

[Koleksion Dagiti Nagkauna a Ladawan iti Siudad ti Laoag

Rudy Ram. Rumbaoa

wwwkoleksiondagitinagkaunaaladawan.blogspot.com

#torre #pagbantayan #barangaygabu #barangaylapaz #panawen #kastila #siudadtilaoag #karayanpadsan #puyupoyan #baybay #pirata #proteharan #salakniban #galeon #sanddunes #currimao #ilocosnorte #romblon #koleksion #nagkauna #ladawan #retrato #rudyramrumbaoa

[Nabulod ti ladawan a nausar ken ni Bernard Joseph Esposo Guererro]