NO NAGINAD TI PANNAKAIPAAY ITI HUSTISIA

NO NAGINAD TI PANNAKAIPAAY ITI HUSTISIA

Retrato, N.36

[Koleksion Dagiti Nagkauna a Ladawan iti Siudad ti Laoag

ken Pagilian a Filipinas]

IDI Maikadua a Gubat iti Sangalubongan, rinibribu a Filipino ti nailista ti naganna a maikameng iti puersa ti armada ti Estados Unidos. Naggapu dagitoy iti sabalisabali a grupo a kas ti Philippine Scouts, Philippine Commonwealth Army ken dadduma pay a mabigbig a gerilia wenno rebulosionario a tignay. Naited kadagitoy a Filipino ti responsibilidad a makirupak kadagiti kabusor iti pannakikammayet ken pannakikaysana ti armada iti America.

Aldaw ken rabii nga awan sarday dagitoy a Filipino a nagbantay kadagiti puesto a destinoda tapno masalakniban ken malapdan ti ania man a pannakaraut manipud iti kabusor. Adu a sakripisio ken panaganus. Iti laksid ti rigat a nalak-amda, kas da la bulsek a mangnamnama iti isisiray ti lawag manipud iti sipnget a nanglikmut kadakuada iti kabambantayan a naggiananda tapno maliklikan ti pannakakemmeg, nayadayoda pay kadagiti pamiliada. Ngem awan gasat dagiti dadduma, nakemmeg ken innala ida dagiti kabusor; nagbalinda a prisoners-of-war, naparparigat ken nasentensiaan iti dusa a patay. Isuda dagiti Filipino a nangirisgo ti biag ken daton a nagpaay para iti amin a Filipino ken iti nagan ti Estados Unidos.

Gapu iti napudno a serbisio a naaramidan dagiti Filipino, inkari ti gobierno ti Estados Unidos a maited kadakuada ti benepisio a kapada nga awaten dagiti sabsabali pay a pagilian a nagserbi iti armada ti America. Karaman ditoy a benepisio ti health care, pension money ken college money.

Nupay kasta, iti pannakaipasa ti paglintegan a maawagan ti Rescission Act of 1946, naikkat kadakuada ti naikari a kalintegan a mangawat ti benepisio. Ti nakas-ang pay, nairaman ti saan a pannakabigbig ti kalintegan dagiti nakakompleto iti kina-first enlistment a makipagili iti America. Ket gapu ti daytoy a paglintegan, maibilang wenno maikonsiderar a saan nga aktibo ti serbisio nga impaay dagiti Filipino ket nailibak wenno pinaglikudan ti EU ida--- iti ababa a pannao, naibasura ti benepisio ken/wenno prebilehio a karbengan ken pannakabigbig a legal ti serbisio nga impaayda iti armada idi nakirupakda kadagiti kabusor iti Maikadua a Gubat ti Sangalubongan.

Iti nasapa a paset ti tawen 1980, timmaud dagiti tignay-protesta a mangkidkiddaw iti pannakaited ti naikari a benepisio kadagitoy a Fil Vets. Nagwaras no di pay napalawa ti suporta dagiti tattao kadagiti beterano--- ti panangirupirda ti kalintegan dagiti Fil Vets a makipagili iti America ken pannakaipaay kadakuada ti "injury compensation and treatment" no mataming ti salun-atda kadagiti Veterans Affairs hospitals.

Ket nupay iti likudan ti panagintutuleng ti gobierno ti America kadagitoy iyar-arungaingda, saan a nagsarday ken nagtultuloy latta met ti tignay-protesta dagiti beterano ayatda la a mapatgan ti kiddawda. Adda met dagiti nakisimpatia--- dagiti bukod a pamilia, gagayyem, makaam-ammo ken grupo a nangipaay iti pannuporta tapno luktan ti America ti lapayagna. Ken uray pay ti komunidad dagiti Filipino-Americans, nakikammayetda met iti tignay nga inyuswat dagiti beterano. Indawatda pay iti gobierno ti panangsirig ken pannakatingiting a naimbag ti nasao a dawat tapno maikkan konsiderasion iti pannakaited ti naan-anay a suporta iti Filipino Veterans Fairness Act--- maysa a linteg a mangilunglungalong iti pannakaited ti karbengan a makipagili iti Estados Unidos dagiti Filipino a nakakompleto ti kina-enlistment iti armada.

Idi tawen 2009, immay ti dakkel a balligi kadagiti beterano idi pirmaan ni Presidente Barack Obama ti American Recovery and Reinvestment Act [ARRA]--- a nakaipalaonan ti Filipino Veterans Equity Compensation ken mangibagbaga ti madagdagus a pannakaited ti pannuporta wenno ayuda kadagiti beterano a Filipino iti Maikadua a Gubat ti Sangalubongan. Agdagup $198 million equity compensation wenno maawat ti tunggal maysa ti bingayna nga one-time lump sum payment nga agdagup iti $15,000 kadagiti US Citizens ken $9,000 para kadagiti non-citizens.

Nupay ti laengen pannakaited ti makuna a "kompensasion" ti kurangna, naiget ken arisiten latta met a naimbag ni Uncle Sam dagiti pudno a nagserbi iti armada. Saanna latta met basta yawat a kasla mamaen ti nasao a gatad. Isu a nagtalinaed latta a nakiro ti estado dagitoy a Filipino veterans gapu iti multiple classification a listaan nga iggem a dokumento ti Department of Veterans Affairs [DVA].

No nakalista ti nagan ti maysa a beterano iti US Army ken nagserbi daytoy iti salinong ti Philippine Scouts, makuna a pudno ken kualipikado. Ngem sumango met ti adu a tubeng gapu iti makunkuna nga "structural ken bureaucratic barriers" wenno bangen/lapped iti pannakaited ti benepisio kadagiti beterano nga adda iti salinong ti Commonwealth Army ken gerilia wenno rebulosionario a tignay.

Kalpasan iti panagipilaan idi tawen 1946, naaramid ti maikadua a pannakabilang ti nagnagan dagiti beterano idi 1948. No maibasar iti agdama a pagrukodan ti pannakabigbig a nagserbi ti maysa a beterano idi Maikadua a Gubat ti Sangalubongan, masapul nga idatag ti beterano a karaman [isuna] ti naganna iti listaan ti 1948 ken ti discharge papers-da.

Idi Disiembre 29, 2011, nasurok a 24,000 a Filipino WWII veterans ti diskualipikado wenno nailibak ti kalinteganda a mangawat ti benepisio. Adda met agarup 4,000 a beterano ti agur-uray iti resulta ti panagapelada iti Board of Veterans' Appeal [BVA]. Ket kadagiti 66 a pagilian a kaaliado ti Estados Unidos iti Maikadua a Gubat ti Sangalubongan, dagiti laeng Filipino ti nailibak ti kalinteganda ken/wenno saan a naited iti umisu a benepisio a rumbeng nga awatenda.

Ket daytoy ti kinapudno, adut' maaramid ti kuarta--- mapagtignayna amin a banag. Ngem makatulong kadi daytoy a mangkoreher wenno mangilinteg ti inhustisia ken diskriminasion a nalak-am ken nagpasaran dagiti ing-ingungotentayo a beterano? Saan. Nalabit, no saan a dagitoy a kalak-amanda ken sakripisio no kasano ti rigat iti kaadda ti gubat, nakaadalda ngata met wenno nakastrekda iti napimpintas a pagtrabahuan tapno masuportaran dagiti pamiliada. Nalabit, naited ngata met kadakuada ti pudpudno ken umisu a pannakataripato ti salun-at no kasapulan ken malapdan iti gradual a panagsalog ti salun-atda.

Gapu ta kaaduan kadagitoy a beterano ti agtawenen iti 80s ken 90s, mauraydanto pay ngata nga awaten ti kompleto ken umisu a benepisio no naginad met ti pannakaipaay iti hustisia kadakuada?

.

.

.

.

.

NO NAGINAD TI PANNAKAIPAAY ITI HUSTISIA

Retrato, N.36

[Koleksion Dagiti Nagkauna a Ladawan iti Siudad ti Laoag ken Pagilian a Filipinas

Rudy Ram. Rumbaoa

wwwkoleksiondagitinagkaunaaladawan.blogspot.com

*immuna a naipablaak iti Fil-Observer ti Maui November Issue iti kolumko a Di Nakapappapati, Ngem Pudno

#naginad #pannakaipaay #hustisia #filipinoveterans #filipinoamericanveterans #estadosunidos #armada #maikaduaagubattisangalubongan #koleksion #nagkauna #ladawan #laoagcity #filipinas #rudyramrumbaoa

[nabulod ti ladawan a nausar]

 

DAGITI ESTUDIANTE TI LAOAG CENTRAL SCHOOL, ILOCOS NORTE, 1913

DAGITI ESTUDIANTE TI LAOAG CENTRAL SCHOOL,

ILOCOS NORTE, 1913

Retrato, N.35

[Koleksion Dagiti Nagkauna a Ladawan iti Siudad ti Laoag]

MAKITA iti daytoy a ladawan ti grupo dagiti estudiante ti Laoag Central School iti Ilocos Norte a mapattapatta a naala iti 1913 bayat ti nasapa a tawen ti American colonial education system iti Filipinas. 

Nagaruat dagiti estudiante iti simple ngem nadalus a pagan-anay idi simmango dagitoy iti kamera tapno maalaan ti ladawan---nga iyanninawna ti alisto nga irurungbo ti banag nga ipangruna pakaseknan ti pormal nga edukasion iti dayta a tiempo.

Naestablisar a kas paset ti Philippine public school system nga inyam-ammo dagiti Amerikano. Maysa ti Laoag Central School kadagiti nagkaadu nga institusion a nangipaay ti elementary education iti ingles tapno masuposupan dagiti subjeto iti panagbasa, panagsurat, aritmetika ken sibiko. Kaaduan kadagiti estudiante ti naggapu iti nagduduma a lugar ken ili ti Ilocos Norte---a mangibagi ti baro a henerasion dagiti Filipino nga edukado iti babaen ti moderno a kurikulom a ti panggepna ket tapno mapadur-as ti literasia iti pagilian.

Agserbi ti ladawan a kas testimonia iti transpormasion ti edukasion iti Filipinas---ken nangipakita kadagiti ilokano nga agtutubo no nakasano nga inarakupda ti panagsursuro ken maisagana ti baro nga opurtunidad iti alisto a panagbalbaliw ti sosiedad.

.

.

.

.

.

DAGITI ESTUDIANTE TI LAOAG CENTRAL SCHOOL,

ILOCOS NORTE, 1913

Retrato, N.35

[Koleksion Dagiti Nagkauna a Ladawan iti Siudad ti Laoag]

Rudy Ram. Rumbaoa

wwwkoleksiondagitinagkaunaaladawan.blogspot.com

[Nabulod ti ladawan a nausar iti Herencia Filipinas]

#herenciafilipinas #laoagcentralschool #ilocosnorte #laoagcity #informative #article #edukasion #panagduras #nagkaunaaladawan

#rudyramrumbaoa

KAPILIA TI KATOLIKO ITI KAMPOSANTO TI LAOAG

KAPILIA TI KATOLIKO ITI KAMPOSANTO TI LAOAG

Retrato, N.12

[Koleksion Dagiti Nagkauna a Ladawan iti Siudad ti Laoag]

SAAN a nalatak ken di unay ammo nga atraksion daytoy colonial-era a kapilia ti katoliko iti kamposanto ti siudad kadagiti turista ken gangannaet nga agpaspasiar iti probinsia ti Ilocos Norte—- nga agingga ita, maus-usar pay laeng iti tiempo ti dipinturong wenno fiesta dagiti natay.

Kuna ti heritage blogger Estan Cabigas, “maysa daytoy kadagiti nabatbati a kapilia iti pagilian a pakakitaan nga agkakamang pay laeng dagiti radrilio a nakakapet iti mismo a bagi ti pasdek.”

Ti parupa ti kapilia isut’ maysa a kapintasan nga ehemplo ti makuna nga “typical northern Ilocano template” wenno iladawanna ti maipapan kadagiti naisangsangayan a karakteristiko ni Ilocano mainaig ti maysa banag, pasamak ken lugar ti siensia ken arte maipapan iti panagdisenio kadagiti pasdek para ti simbaan.

.

.

.

.

.

KAPILIA TI KATOLIKO ITI KAMPOSANTO TI LAOAG

Retrato, N.12

Koleksion Dagiti Nagkauna a Ladawan iti Siudad ti Laoag

Rudy Ram. Rumbaoa

wwwkoleksiondagitinagkaunaaladawan.blogspot.com

#kapilia #kamposanto #katoliko #nagkauna #langa #ladawan #siudadtilaoag #ilocosnorte #dipinturong #atraksion #estancabigas #ilocanotemplate #karakteristiko #colonialera #ilocano #disenio #simbaan #radrillo

*Nabulod dagiti nausar a ladawan iti Wikipedia ken Estan Cabigas.

 

Gabaldon Law

GABALDON LAW

Retrato, N.o9

[Koleksion Dagiti Nagkauna a Ladawan iti Siudad ti Laoag]

INLAWLAWAG ni dati nga Assemblyman Isauro Gabaldon ti inesponsoranna

a linteg no apay a nabukel ti Act [Aramid] 18o1 nga ad-adda a nalatak nga awagna a "Gabaldon Law." Ti kangrunaan a gagem ti Gabaldon Law ket tapno maital-o ti edukasion nga agpaay para iti amin--- ken mangilawlawag no apay a daytoy a klase ti pasdek "Gabaldon" ket masarakan iti intero a pagilian a Filipinas.

Nairaman iti disenio a masurot ti pannakabangon ti Gabaldon Law iti blueprint-na ti adu a parte wenno paset ti siam a classrooms [kuarto a pagisuroan], biblioteka, property room, ofisina ti prinsipal ken pagguummongan a lugar a makalaon iti uppat a gasut a tattao. Nabangon ti nasao a pasdek iti agarup uppat nga ektaria a lote a namulaan ti kayo iti aglawlaw ken naaladan.

Kadagiti kuarto a pagbasaan ti Gabaldon Buildings, nagustoan ken naay-ayo dagiti Filipino a nangrikna ti wayawaya a naipaidam kadakuada bayat ti panangsakop dagiti Espaniol ti pagilian. Addan dagiti Amerikano a nagisuro kadagiti Gabaldon Buildings iti tawen 19o7 ngem nagngudo ti akemda idi 1935 idi sublaten dagiti Filipino a manursuro ti posisionda.

Iti probinsia ti Ilocos Norte, naidukomento nga adda mapattapatta a 12 nga Gabaldon schools. Iti laksid a nagbalin dagitoy nga heritage structures, dagitoy nga Gabaldon schools ti nagbalin a saksi iti lokal ken sabsabali pay nga importante a pakasaritaan ti probinsia--- dagiti eskuela, garison [lugar nga ayat dagiti paltog, soldado ken armas] ken dagiti ospital.

.

.

.

.

.

GABALDON LAW

Retrato, N. o9

[Koleksion Dagiti Nagkauna a Ladawan iti Siudad ti Laoag]

Rudy Ram. Rumbaoa

wwwkoleskiondagitinagkaunaaladawan.blogspot.com

*Nabulod ti ladawan a nausar iti Image & Content:

http://museoilocosnorte.com/.../gabaldon.../nggallery/page/2

 

MUSEO ILOCOS NORTE

MUSEO ILOCOS NORTE

Retrato, N.22

[Koleksion Dagiti Nagkauna a Ladawan iti Siudad ti Laoag]

HISTORIKO a pagilasinan iti pakasaritaan ti dati a Tabacalera

wenno faktoria ti tabako iti nagtakderan ti Museo Ilocos Norte.

Maipagarup a dayta ti duog a pasdek ti Administration Center

of the Tobacco Monopoly iti Ilocos Norte idi panawen ti kastila.

Maysa kadagiti kaimportantean a parte ti museo ket naisentro

iti tabako a kangrunaan a produkto ti ilocos.

Iti agdama, maiparang iti museo ti sumagmamano a ramit a mausar

ti pagtalon ken pagkalap--- a maibilang a maysa pay a kangrunaan

a pagsapulan dagiti umili; ket ti tipikal wenno tipo a maipapan

kadagiti naisangsangayan nga Ilocano house furnishings a kas

ti muebles ken alikamen [alfombra, kurtina a maaramat 

a pagdekorar, lupot ken baldosa], ken dagiti kadaanan 

a naikuadro a ladladawan ti Ilocos.

Maiparang pay ditoy ti way [rattan], inabel/abel a lupot 

ni Ilocano a kas ti abel-iloko ken sabsabali pay a tipikal

a pagan-anay [aruaten]; ken artifekto nga aggapu manipud 

iti nagduduma a parte ti probinsia.

Aglukat ti Museo iti aldaw ti Lunes ingganat' Sabado

iti oras ti alas nuebe ti bigat agingga iti alas singko

ti malem.

Inkayon, pasiaren ita!

.

.

.

.

.

MUSEO ILOCOS NORTE

Retrato, N.22

[Koleksion Dagiti Nagkauna a Ladawan iti Siudad ti Laoag]

Rudy Ram. Rumbaoa

wwwkoleksiondagitinagkaunaaladawan.blogspot.com

[Nabulod ti ladawan a nausar]

TI LAOAG-ILOCOS NORTE TRACK TEAM BOYS, 1910

TI LAOAG-ILOCOS NORTE TRACK TEAM BOYS, 1910

Retrato, No. 32

[Koleksion Dagiti Nagkauna a Ladawan iti Siudad ti Laoag ken 

Probinsia iti Ilocos Norte]

NAKALALAGIP ti historiko a pakasaritaan daytoy ladawan a nasurat 

a mangitantan-ok kadagiti umaayam a lallaki iti Laoag-Ilocos Norte Track Team idi tawen 191o bayat ti kinaagtutubo a pigsa 

ken napnoan espiritu ti kina-atletiko a kababalin a panagduyos

iti ehersisio ken ay-ayam.

Makita iti ladawan a nagkawes laeng ti team boys iti simple 

nga atletiko nga aruat wenno pagan-anay a mangirepresentante 

ti imahe ti organisado nga ay-ayam iti Filipinas

idi un-unana a panawen no sadino a makipaset ti lokal 

a komunidad iti pisikal a kompetision kas paset ti edukasion 

ken pagliwliwaan.

Maysa nga ili ti Laoag nga am-ammo kadagiti napnoan maris 

ken pakasaritaan ti kultura ken nagrugian a nagsursuroan 

ti kinadisiplinado a talento dagiti umaayam idi 2oth century.

Ipakita daytoy a ladawan ti manmano wenno naidumduma a buya 

ti kina-atletiko a langa iti tradision ti ilocos Norte 

a mangitandudo ken mangitangsit ti dayaw ken determinasion

ti agtutubo nga atletiko a mangsaranget ken mangsukog 

ti pakasaritaan ti ay-ayam iti rehion.

.

.

.

.

.

TI LAOAG-ILOCOS NORTE TRACK TEAM BOYS, 1910

Retrato, No. 32

[Koleksion Dagiti Nagkauna a Ladawan iti Siudad ti Laoag ken

Probinsia iti Ilocos Norte

Rudy Ram. Rumbaoa

wwwkoleksiondagitinagkaunaaladawan.blogspot.com

[Nabulod ti ladawan a nausar iti Herencia Filipinas]

 

Laoag City Commercial Complex

 

[Nabulod dagiti ladawan a nausar]

LAOAG CITY COMMERCIAL COMPLEX

RETRATO N.29

[Koleksion Dagiti Nagkauna a Ladawan ti Siudad ti Laoag]

MASARAKAN ti Laoag City Commercial Complex [Laoag City Market]

iti sentro ti komersio ti siudad. Naibalay iti nasao a commercial

complex dagiti nagduduma a klasena a negosio a kas ti dry-goods,

kitchenwares, glasswares, kdpy. 

Iti basement [iti baba a pasetna] daytoy tallo kadsaaran a moderno

a tiendaan ti Laoag, masarakan ditoy ti local handicrafts, natibo

a produkto a kas ti bawang, suka ti iloco, niog, sibuyas, nagduduma 

a klasena a nateng ken dadduma pay.

Ti maikadua a kadsaaran iti nakaipuestoan ti wet ken meat section.

Magatang met ditoy dagiti lames a naggapu iti taaw ken karayan ken

pakasaraan ti nalatak a bagnet ti ilocos ken longganisa.

No agsapsapul met iti souvenir items a para sarabo, makita 

ti lokasionna iti amianan a paset ken ruar ti pasdek ti tiendaan.

Magatang ditoy dagiti paborito nga Ilocano chips a kas ti Chiphapop,

Chicharon, Camote Chips, cornick ken sabsabali pay a lokal 

nga aramid ken produkto.

.

.

.

.

.

wwwkoleksiondagitinagkaunaaladawan.blogspot.com

ILOCOS NORTE HEROES MEMORIAL [INHM] HALL

 

RETRATO N.28
[Koleksion Dagiti Nagkauna a Ladawan ti Siudad ti Laoag]

ILOCOS NORTE HEROES MEMORIAL [INHM] HALL wenno ti nalatak nga awagna a “HEROES HALL”

MAYSA kadagiti naimballigian unay a napasamak iti probinsia idi nasapa a tawen ti 1970’s ket ti pannakabangon ti Ilocos Norte Heroes Memorial [INHM] Hall, wenno ti nalatlatak nga awagna a “HEROES HALL” iti sentro ti Siudad ti Laoag. Masarakan daytoy a pasdek iti asideg ti Laoag City Plaza [wenno Aurora Park ita], Marcos Hall of Justice, Laoag Central School, torre ti pagkampanaan ni San Guillermo, dagiti simbaan ti Katoliko Romano ken Aglipayano, City Hall ti Laoag ken Kapitolio ti Probinsia ti Ilocos Norte. Dati pay a naawagan ti nasao a pasdek iti “Ablan Heroes Memorial Hall.” Immabot iti tallopulo ket tallo tawen ti konstuksion sakbay a nalpas ti nasao a pasdek.

Naisangsangayan ti kontribusion ti pasdek iti pakasaritaan ti probinsia ti lugar a nagtakderan ti Heroes Hall iti agdama. Dakkel nga espasio ti nasao a lugar a nagserbi a pakaangayan dagiti sosial, kultural ken politika a parambak kas ti civic-military parades, pasala, demonstrasion iti paay-ayam, trade fairs, political rallies, evening dances, coronation rites ken pagpabuyaan ti karnibal. 

Nabangon ti Gabaldon a disenio ken klasena a pasdek ti Laoag Central School idi tawen 1929, nagtalinaed ti nasao a lugar a silulukat kadagiti amin a maangay a parambak agingga a narugian ti pannakabangon ti pasdek kalpasan ti Maikadua a Gubat ti Sangalubongan.

Narugian ti konstruksion ti Ablan Heroes’ Memorial Hall iti panawen ti panagtugaw ni Diputado Dr. Damaso T. Samonte iti Umuna a Distrito ti Ilocos Norte, 1946-1949. Ngem daksanggasat ta napasardeng ti proyekto gapu iti panagkurang ti pundo a mausar. Nupay kasta gapu iti singasing wenno mosion ni Gobernador Elizabeth Marcos-Keon, agdama a gobernador idi,  inaprobaran ti provincial board ti Ilocos Norte ti 1971 resolution no. 48 a P10,000.00 manipud iti Roads and Bridges Fund ti probinsia tapno maileppas ti Ablan Heroes Memorial Hall. Nagtultuloy ti panagdur-as ti konstruksion agingga iti tawen 1974. Iti napintas a panangidaulo ni Gob. Marcos-Keon ti probinsia, nabaliwan ti Ablan Heroes’ Memorial Hall iti Ilocos Norte Memorial Hall [INMH] a maidedikar ken maisagut kadagiti amin a bannuar ti Ilocos Norte.

Naawagan pay ti pasdek a maysa kadagiti kapintasan nga architectural marvel ken simbolo ti progreso iti probinsia.

Ti Heroes Hall ket 4-storey building. No addaka iti ngato [rooftop] a paset ti pasdek, nalawag a matannawagan ken makita iti baba ti Karayan Padsan ken intero a pakabuklan ti Gilbert Bridge [Marcos Bridge itan].

Dramatiko ti karakter a buya ti INMH ta nausar ti columns ken arc-window a disenio a maitulad kadagiti pasdek iti Amerika.
.
.
.
.
.
*Nabulod dagiti ladawan a nausar iti PGIN CMO/Alaric A. Yanos]

wwwkoleksiondagitinagkaunaaladawan.blogspot.com

MUSEO ILOCOS NORTE

 

[Nabulod ti ladawan a naaramat]

RETRATO N.22

[Koleksion Dagiti Nagkauna a Ladawan ti Siudad ti Laoag]

MUSEO ILOCOS NORTE

Historiko a pagilasinan ti pakasaritaan ti dati a pasdek

ti Tabacalera wenno faktoria ti tabako a nagtakderan

ti Museo Ilocos Norte ita. Dayta ti duog a pasdek

ti Administration Center of the Tobacco Monopoly iti

Ilocos Norte idi panawen ti kastila. Maysa kadagiti

kaimportantean a parte ti museo ket naisentro iti tabako,

ti kangrunaan a produkto ti probinsia.

Iti agdama, maiparang iti museo ti sumagmamano a ramit 

a mausar iti panagtalon ken pagkalap--a maibilang a maysa pay

a kangrunaan a pagsapulan dagiti umili; ti tipikal wenno tipo

maipapan kadagiti naisangsangayan nga Ilocano house furnishings

a kas ti muebles ken alikamen [alfombra, kurtina a maaramat

a pagdekorar, lupot ken baldosa]; ken naikuadro a kadaanan 

a ladawan ti Ilocos. 

Maiparang pay ditoy ti way [rattan], inabel/abel a lupot

ni Ilocano kas ti abel-iloko ken sabsabali pay a tipikal

a pagan-anay; ken artifekto manipud iti nagduduma a parte

ti probinsia.

Aglukat ti Museo ti Lunes ingganat' Sabado iti oras ti 

alas nuebe ti bigat agingga iti alas singko ti malem.

Inkayon, pasiaren ita!

wwwkoleksiondagitinagkaunaaladawan.blogspot.com

PUENTES DE AMOR

 

[Nabulod ti ladawan a naaramat]

RETRATO N.2o

[Koleksion Dagiti Nagkauna a Ladawan ti Siudad ti Laoag]

PUENTES DE AMOR

Di nakita wenno di nabigbig [nga insigida] a maysa

kadagiti [na]tawid nga imprastraktura a rangtay

ti Puentes De Amor a maipannakkel a kukua ti Probinsia

ti Ilocos Norte.

Masarakan ti nasao a rangtay iti Barangay Barit

iti Siudad ti Laoag. Daytoy a "Puente De Barit" ti

maysa kadagiti uppat nga Spanish Bridges ti Laoag: ti Barit,

Tupec, Bulangon ken San Mateo. 

Dinakamat ken nairaman dagiti uppat a rangtay iti datos

nga insumite ni Ilocos Norte Civil Governor Camillo Millan 

a naidukomento pakaseknan ti estado ti probinsia idi 1887.

Napreserba ti panangisurat [handwritten report] ni Millan

ti dukomento iti National Archives of the Philippines.

.

.

.

.

koleksiondagitinagkaunaaladawan.blogspot.com